വളരെ സന്തോഷത്തോടെ ഒരു യാത്രയ്ക്കായി വിമാനത്താവളത്തില്‍ എത്തിയ നിങ്ങള്‍ ബാഗ് സ്‌കാന്‍ ചെയ്ത് കിട്ടുന്നതിനായി കാത്തിരിക്കുകയാണ്. പക്ഷേ ഒപ്പമുണ്ടായവര്‍ക്കും പിറകെ വന്നവര്‍ക്കും എല്ലാം അവരുടെ ബാഗുകള്‍ സ്‌കാന്‍ ചെയ്ത് കിട്ടിയിട്ടും നിങ്ങള്‍ക്ക് മാത്രം ബാഗ് സ്‌കാന്‍ ചെയ്ത് കിട്ടുന്നില്ല. എന്താണ് സംഭവിച്ചതെന്ന് നിങ്ങള്‍ ചോദ്യം ഉയര്‍ത്തും. പക്ഷേ സംഭവിക്കാന്‍ പോകുന്നത് നാണക്കേടുള്ള കാര്യമാണ്. സുരക്ഷാ ജീവനക്കാര്‍ നിങ്ങളെ ഒരു വശത്തേക്ക് മാറ്റി നിര്‍ത്തുകയും നിങ്ങളുടെ ബാഗിലുള്ള സാധനങ്ങള്‍ പരിശോധിക്കുകയും ചെയ്യും.
അപ്പോഴായിരിക്കും കൊണ്ടുപോകാന്‍ പാടില്ലാത്ത എന്തെങ്കിലും നിങ്ങളുടെ ബാഗിലുണ്ടെന്ന് കണ്ടെത്തുന്നത്. വിമാന യാത്രയ്ക്ക് എത്തുമ്പോള്‍ നിങ്ങളുടെ ഹാന്‍ഡ് ബാഗില്‍ ഒരിക്കലും കൊണ്ടുപോകരുതാത്ത ചില സാധനങ്ങളുണ്ട്. അവ ഏതൊക്കെയാണെന്ന് നോക്കാം.
വിമാന യാത്രയില്‍ ഒരിക്കലും ഹാന്‍ഡ് ബാഗില്‍ കൊണ്ടുപോകാന്‍ പാടില്ലാത്ത സാധനങ്ങള്‍
മൂര്‍ച്ചയുള്ള വസ്തുക്കള്‍
കത്തികള്‍, കത്രികകള്‍, റേസര്‍ ബ്ലേഡുകള്‍, നഖംവെട്ടി എന്നിവ പോലെയുള്ള മൂര്‍ച്ചയുള്ള വസ്തുക്കള്‍. മറ്റുളളവര്‍ക്ക് ദോഷം വരുത്തുന്ന എന്തും വിമാനത്താവള സുരക്ഷാ ഏജന്‍സികള്‍ ആയുധമെന്ന നിലയിലാണ് കണക്കാക്കുന്നത്. അതുകൊണ്ടുതന്നെ ബാഗിനുളളില്‍ മൂര്‍ച്ചയുള്ളത് എന്തെങ്കിലും ഉണ്ടെങ്കില്‍ അത് ഒഴിവാക്കാന്‍ ശ്രദ്ധിക്കുക.
100 മില്ലിയില്‍ കൂടുതലുളള ദ്രാവകങ്ങള്‍
ഇന്ത്യന്‍ വിമാനത്താവളങ്ങളില്‍ ഹാന്‍ഡ് ബാഗില്‍ ദ്രാവകങ്ങള്‍ കൊണ്ടുപോകുന്ന കാര്യത്തില്‍ ചില നിയമങ്ങള്‍ പാലിക്കേണ്ടതുണ്ട്. 100 മില്ലിയില്‍ കൂടുതലുളള കുപ്പിയോ കണ്ടെയ്‌നറോ. അതില്‍ വെള്ളം, ഷാംപൂ, സോസ്, അച്ചാര്‍ അല്ലെങ്കില്‍ പെര്‍ഫ്യൂം എന്തായാലും സുരക്ഷാ ഉദ്യോഗസ്ഥര്‍ അത് നിരീക്ഷിക്കും. 100 മില്ലിയില്‍ കുറവുളള കുപ്പികള്‍ സുതാര്യമായ പൗച്ചില്‍ വയ്ക്കുക എന്നതാണ് ഏറ്റവും സുരക്ഷിതമായ രീതി.
ലൈറ്ററുകളും തീപ്പെട്ടികളും
നിങ്ങളുടെ ഹാന്‍ഡ് ബാഗില്‍ ലൈറ്ററോ തീപ്പെട്ടിയോ പോലും കണ്ടെത്തിയാല്‍ സുരക്ഷാ ഏജന്‍സികള്‍ തടഞ്ഞുവയ്ക്കും. ഈ വസ്തുക്കള്‍ തീപിടിക്കുന്ന അപകടകാരികളായ വസ്തുക്കളായി കണക്കാക്കുന്നു. പുകവലിക്കുന്നവര്‍ക്കാണ് മിക്കപ്പോഴും ഈ തെറ്റുകള്‍ സംഭവിക്കുന്നത്.
160 wh ല്‍ കൂടുതലുള്ള പവര്‍ ബാങ്കുകള്‍
വിമാന യാത്രയില്‍ പവര്‍ബാങ്കുകള്‍ ക്യാബിന്‍ ബാഗുകളില്‍ മാത്രമേ കൊണ്ടുപോകാന്‍ അനുവദിക്കുകയുള്ളൂ. ഇവ ചെക്ക് - ഇന്‍ ലഗേജില്‍ കൊണ്ടുപോകാന്‍ പാടില്ല. 160 വാട്ട് അവറില്‍ കൂടുതലുളള ഏതൊരു ബാറ്ററിയും കര്‍ശനമായി നിരോധിച്ചിരിക്കുന്നു.
ടൂള്‍സ് ആന്‍ഡ് എക്യുപ്‌മെന്റ്
ചുറ്റികകള്‍, സ്‌ക്രൂഡ്രൈവര്‍ , പ്ലയര്‍ അല്ലെങ്കില്‍ ചെറിയ സ്പാനര്‍ എന്നിവയൊന്നും ഹാന്‍ഡ് ബാഗില്‍ അനുവദനീയമല്ല. ഇവയെല്ലാം ആയുധങ്ങളുടെ ഗണത്തിലാണ് കണക്കിലാക്കുന്നത്. അത്യാവശ്യമാണെങ്കില്‍ അത് നിങ്ങളുടെ ചെക്ക് - ഇന്‍ ബാഗില്‍ സൂക്ഷിക്കാവുന്നതാണ്.
സ്‌പോര്‍ട്ടിംഗ് ആന്‍ഡ് ഫിറ്റ്‌നസ് ഗിയര്‍
ക്രിക്കറ്റ് ബാറ്റുകള്‍, ഹോക്കി സ്റ്റിക്കുകള്‍, ടെന്നീസ് റാക്കറ്റുകള്‍, ഡംബെലുകള്‍ അല്ലെങ്കില്‍ സ്‌കിപ്പിംഗ് റോപ്പുകള്‍ പോലുള്ള വസ്തുക്കള്‍ നിങ്ങളെ പ്രതിക്കൂട്ടിലാക്കാന്‍ സാധ്യതയുണ്ട്. സ്‌പോര്‍ട്‌സ് അല്ലെങ്കില്‍ ഫിറ്റ്‌നെസ് ഉപകരണങ്ങള്‍ എന്ന നിലയില്‍ അവ നിരുപദ്രവകരമായി തോന്നിയേക്കാം. പക്ഷേ അവയെ സുരക്ഷാ അപകടസാധ്യതയുമായി കണക്കാക്കിയേക്കാം. നിങ്ങള്‍ മത്സരത്തിന്റെ ആവശ്യത്തിനോ വ്യായാമത്തിനോ ആയി യാത്ര ചെയ്യുകയാണെങ്കില്‍ ഇത്തരം ഉപകരണങ്ങള്‍ നിങ്ങളുടെ പ്രധാന ലഗേജില്‍ പായ്ക്ക് ചെയ്യാവുന്നതാണ്.
ഇലക്ട്രോണിക് സിഗരറ്റുകള്‍
ഇന്ത്യന്‍ വിമാനത്താവളങ്ങളില്‍ ഇ-സിഗരറ്റുകള്‍ നിരോധിച്ചിരിക്കുന്നു. നിയമപ്രകാരം അധികാരികള്‍ ഇവയെ നിയന്ത്രിത ഇനങ്ങളായി കണക്കാക്കുന്നു. കൂടാതെ സുരക്ഷാ ചെക്ക് പോസ്റ്റുകളില്‍ ഇവ കണ്ടുകെട്ടുകയും ചെയ്യും. ചില സന്ദര്‍ഭങ്ങളില്‍ അവ കൊണ്ടുപോകുന്നത് പിഴയ്ക്ക് പോലും ഇടയാക്കും.
സ്‌പ്രേകള്‍
വലിയ ഡിയോഡറന്റ് ക്യാനുകള്‍, ഹെയര്‍ സ്‌പ്രേകള്‍, കീടനാശിനി സ്‌പ്രേകള്‍ തുടങ്ങിയ പ്രഷര്‍ നിറഞ്ഞ ബോട്ടിലുകള്‍ ഹാന്‍ഡ് ബാഗില്‍ അനുവദനീയമല്ല. 100 മില്ലിയുടെ ചെറിയ വലിപ്പമുളള സ്‌പ്രേകള്‍ അനുവദനീയമാണെങ്കിലും വലിയ കാനുകള്‍ സുരക്ഷ കണക്കാക്കി നീക്കം ചെയ്യും.
ഹാന്‍ഡ് ബാഗില്‍ കൊണ്ടുപോകാന്‍ കഴിയുന്ന വസ്തുക്കള്‍
വസ്ത്രങ്ങള്‍, മരുന്നുകള്‍, ടൂത്ത് ബ്രഷുകള്‍, ടൂത്ത് പേസ്റ്റ്, ഡിയോഡറന്റ് തുടങ്ങിയ ടോയ്ലറ്ററികള്‍ 100 മില്ലി അല്ലെങ്കില്‍ അതില്‍ താഴെയുള്ള ബോട്ടിലുകളില്‍ അനുവദനീയമാണ്. അവ വ്യക്തവും വീണ്ടും അടയ്ക്കാവുന്നതുമായ ബാഗില്‍ പാക്ക് ചെയ്യാം. സെല്‍ഫോണുകള്‍, ചാര്‍ജറുകള്‍, ലാപ്‌ടോപ്പുകള്‍, ക്യാമറ, പാസ്പോര്‍ട്ടുകള്‍, വിസകള്‍, ഐഡി കാര്‍ഡുകള്‍, യാത്രാ രേഖകള്‍ എന്നിവ എളുപ്പത്തില്‍ കൊണ്ടുപോകുന്നതിനായി നിങ്ങളുടെ കൈയിലുള്ള ലഗേജില്‍ സൂക്ഷിക്കണം. എനര്‍ജി ബാറുകള്‍, നട്ട്‌സ്, ഉണക്കിയ പഴങ്ങള്‍ പോലുള്ള ലഘുഭക്ഷണങ്ങള്‍, സുരക്ഷാ പരിശോധനയ്ക്ക് ശേഷം വാങ്ങുന്ന പാനിയങ്ങള്‍, കുട്ടികള്‍ക്കുള്ള ഭക്ഷണവും പാലും ഇവയൊക്കെ അനുവദനീയമാണ്.
Content Highlights :Things you should not put in your hand bag when boarding at the airport